„Кед голубица лєцела” у знаку 25-рочнїци снованя ШК РРЛ

автор зам фото феб
986 Опатрене

ПЕТРОВЦИ  (ГОРВАТСКА) – У орґанизациї Дружтва Руснацох у Републики Горватскей (РГ) „Руснак”, всоботу, 8. октобра, у Петровцох отримана Културна програма „Кед голубица лєцела”, на хторей участвовали представителє орґанизацийох зоз скоро шицких жемох-членїцох Шветового конґресу (ШК) Русинох/Руснацох/Лемкох (РРЛ), медзи нїма и спред Рускей матки (РМ) зоз Сербиї.

Манифестация отримана у соорґанизациї з Општину Стари Янковци, Месним одбором Петровци и КУД „Яким Гарди” з Петровцох, а попри домашнїх шпивацких ґрупох з Дружтва „Руснак” и КУД „Яким Гарди” з Петровцох, спомедзи руских КУД у Горватскей участвовали и шпивацки ґрупи КУД Руснацох Осиєку, КУД „Яким Ґовля” з Миклошевцох и КУД „Осиф Костелник” з Вуковару.

На програми у Петровцох участвовали и Мишана шпивацка ґрупа КПД „Карпати” з Вербасу, а свойо поетски твори представели Мария Дорошки и Славко Пап з Руского Керестура.

На „Голбици” наступели и члени Фолклорного ансамблу „Рутения” з Братислави, зоз Словацкей, шпивацка ґрупа „Русинята” з Будапешту, з Мадярскей, як и позната шпивачка Олґа Прокопова и Шпивацка ґрупа „Бетяре” з Мукачова, зоз Закарпатскей обласци України.

„Кед голубица лєцела” отримана у знаку 25-рочнїци снованя Шветового конґресу РРЛ, так же ю провадзели и члени Шветовей ради (ШР) ШК РРЛ, члени Шветового форуму младих РРЛ, чийо схадзки през викенд отримани у Старих Янковцох и Винковцох, а после привитних словох Наталиї Гнатко спред домашнього Дружтва „Руснак”, манифестацию привитали соборски заступнїк и за руску националну меншин у Соборе РГ Велько Кайтази, котри бул и єден зоз сопокровительох манифестациї, та предсидатель и подпредсидатель ШР РРЛ Штефан Лявинец з Будапешту и Мийо Шайтош зоз Старих Янковцох.

 Покровитель Програми бул Совит за национални меншини РГ, а попри Кайтазия, сопокровителє були општини Боґдановци и Стари Янковци, Рада рускей националней меншини Городу Вуковар, Представитель рускей меншини Городу Заґреб и Вуковарско-сримска жупания.

ПОВЯЗАНИ ТЕКСТИ