Кед фамелия зложна, и робота од рук идзе

автор сас
1.4k Опатрене

Кед ше зложа кухар, кухарка и келнер, а кед су з истей фамелиї дзе старши преноша искуства на младих, вец мож предпоставиц же погосцительство и на валалє ма будучносц. Праве так у Хромишовей фамелиї зоз Дюрдьова. Леона, єй син Мирко и унук Ваня вєдно ширя фамелийни бизнис.

Леона вари од седемдзешатих рокох прешлого вику, а кед пошла до пензиї, у погосцительству почала помагац синови. Мирко у тей роботи од осемдзешатих рокох, а Ваня як наймладши, з нїма уж седми рок. Вони тройо ше стараю о погосцительним обєкту у центре Дюрдьова, дзе  ше уж седемнац роки каждей стреди мож засмачиц з добру пражену рибу, або рибову юшку. Три ґенерациї робя вєдно, алє кажде роби тото у тим чим є найлєпши.   Вони варя и послугую у своїм а тиж и у других обєктох, на свадзбох, кресцинох и других преславох.

Кухарка Леона перши єдла верела у своїм обисцу, а другим почала вариц 1970. року, кед достала роботу як кухарка у єдней школи у Петроварадину. Зоз ище двома кухарками, колеґинями, рихтала школяром ужину и полудзенок. Закончела  курс за кухарку, а понеже школа мала свойо лєтовалїща за школярох на горватским приморю, каждого року єден мешац варела истим школяром, алє на морю.

Кед ше  врацела жиц до Дюрдьова,  одлучела поглєдац роботу у валалє. У пицериї робела даскельи роки, а отамаль пошла до пензиї.

Мирко, кухар, свою професийну кариєру започал 1981. року на Брачу у Републики Горватскей, а вец у познатих ресторанох у Новим Садзе и Петроварадину. Концом осемдзешатих и вон ше врацел жиц до свойого родного валалу. Мирко  барз добри орґанизатор, алє и добре познати и по рибовей юшки, його мац Леона по билей юшки и сарми, а наймладши Ваня вредни роботнїк, добри орґанизатор и погосцитель.

Леона почала вариц у школи у Петроварадину

Леона почала вариц у школи у Петроварадину

И ЗОЗ ЖАБЛЮ ПРИХОДЗЕЛИ НА ПОЛУДЗЕНОК

Мирко 1997. року отворел погосцительни обєкт у центре валала,  о котрим  ше нєшка стара його син Ваня. Теди, пред двацец роками роботнїки хтори ше врацали з роботи  часто  зашли  попиц дацо, полудньовац або вечерац, а наднїчаре звичайно фриштиковали пред  тим як одходзели на польо. Нєшка цалком иншак.

– Дакеди ше з Нового Садзу врацали три роботнїцки автобуси,  док нєшка полупразни мини-бус. Та, вец, так и у нас, тераз вше менєй рихтаме, а дакеди сом рихтал пасулю або месо на роштилю по цали дзень, бо вше було госцох. Перши седем роки у тей роботи на валалє були найлєпши – гвари Мирко хтори рибов паприґаш нє престал вариц. Велї з валалу и околних местох знали же стреду у Дюрдьове вше можу коштовац смачни полудзенок з риби. Мирко тоти єдла рихта вецей як седемнац роки.

– Спочатку сом предавал и по шейдзешат порциї на дзень, нє могол сом постарчиц, а паметам же даєдни зоз  Жаблю поряднє приходзели на полудзенок. Док бул живот лєгчейши, шицким було лєпше, та и нам – толкує наш собешеднїк.

Погосцительни обєкт у котрим Хромишово тримаю карчму нє менял випатрунок по 1994. рок. кед є реновирани за емисию „Знанє  иманє” котру ше теди знїмало у Дюрдьове. У спомнутим обєкту дакеди ловаре тримали карчму, а потим ю Мирко, пред дзеветнац роками, превжал од погосцителя Силвия Салака. Нукашньосц наисце автентична,  з велїма ловарскима погарами и фотоґрафиями з лову,  а старина дава окремне чувство прешлосци.

Перше Хромишово тримали лєм карчму, а з часом ю преширели, почали орґанизизовац преслави, а пошвидко и вариц за госцох. Преширели и простор, та нєшка можу вигосциц дзеведзешат души. Єдини су у валалє котри маю простор, кухарох, келнера, алє и цени хтори велїм одвитую. Кед маю вецей роботи, анґажую ище два жени з валалу.

ПОЗНАТА Є ПО БИЛЕЙ ЮШКИ

Андю Леону часто анґажую же би уварала паприґаш, юшку, сарму або рибу за преслави, або за даяки швета. Зна порихтац за три, алє и тристо особи. Кельо чого треба положиц, такой вирахує, а з муштерию ше вше надобре порадза. Знанє и ремесло пренєсла на сина Мирка котри єй часто помага.

У їх доме кухарске ремесло преноша з колєна на колєно

У їх доме кухарске ремесло преноша з колєна на колєно

– Вжиме, кед пост, печеме на дзень и по сто кили риби, а вариме коло двасто литри рибовей юшки. Кед маме вельо роботи, анґажуєме дакого, зивчайно тих котри нам уж длуго помагаю и з хторима вєдно барз добре функционуєме – гвари кухарка Леона.

А у валалє познате хто вари добру и смачну билу юшку, нє треба вельо нагадовац –  андя Леона. Дакеди на свадзбох найчастейше варела сарми, а у дакедишнєй Копчансковей сали, дзе ше орґанизовало свадзби, сарму од рана кладла на шпоргет.

– Сарма найлєпша кед ше помали вари,  сциха и длуго. Теди лїсце у котрей месо скруцене мож и з ложку „порезац” – гвари Леона и визначує же ше трима свойого рецепту и присмачкох,  и хаснує лєм преверени. Нїч єй нє чежко, анї Миркови, та анї Ваньови. Барз патра же би каждей муштериї дали на волю, и же би були у роботи точни, вше порихтани робиц. На рочним одпочивку длуго нє були.

Рихтали Хромишово велї єдла, но тоти цо пошвидко приду до Дюрдьова на  Фестивал жридлового шпиваня „Най ше нє забудзе”, годни ше прешвечиц до того  цо у тей статї написане, бо и з тей нагоди Хромишово буду кухаре.

МАЛИ НАШУ КУХАРКУ

Леону Хромиш волали на велї места же би уварела, або порихтала даяке єдло. Варела и нашим школяром кед пошли до иножемства, у Рускей лєтней школи у Швайцарскей. Там було дзеци з Керестура, Коцура, Дюрдьова, алє  и других наших местох. Дзеци найволєли кед им Леона  напражела фашири.

ПОВЯЗАНИ ТЕКСТИ