Кельо з чопа – тельо з бутєлара

автор тах
1.1k Опатрене

У цалим Вербаше, шицки цо жили у колективним змесценю, односно у будинкох, потераз доставали исти рахунки за воду, брало ше просекове трошенє, а тих дньох ше уградзує централни водомери, же би ше трошенє води раховало по єдним будинку и дзелєло по число квартельошох.

Явне комуналне подприємство „Комуналац” хторе, медзи иншим, подмирює гражданох општини Вербас зоз воду за пице, помали закончує уводзенє централних водомерох до шицких будинкох у Вербаше. Ище лєм даскельо маю достац свойо водомери и з тим будзе цалком утаргнуте паушалне задлужованє трошительох на уровню цалей општини.

Як дознаваме зоз сообщеня того подприємства, зоз уградзованьом централних водомерох, хасновательом услугох у колективним и индивидуалним змесценю ше трошенє води будзе мерац на исти способ, а шицко з цильом рационалнєйшого трошеня того природного ресурсу.

ПРОСЕК НА УРОВНЮ ГОРОДА

У „Комуналцу” толкую же потераз шицки хтори жию у колективним змесценю, односно у будинкох доставали исти рахунки за воду. Мераюци воду, вираховйовало ше просекове трошенє, и на основу того кажде обисце доставало исту суму рахунка.

Медзитим, одкеди ше до будинкох уводза централни водомери, хтори маю числени предносци и хтори предвидзени зоз законом, рахунки буду индивидуални за кажди будинок.

– Маме случаї же на єдним уходзе жию 40 души, а приявене вельо менєй, прето рахунки поєдинцом вельо векши. Скупштини станарох би ришели таки проблеми – гвари директор ЯКП „Комуналац” Драґомир Чурович, а як дознаваме у сообщеню, зоз таким становиском ше складаю и у локалней самоуправи, дзе сам предсидатель Општини надпомина же то єдини способ же би дахто леґитимно представял свой будинок.

09 voda 04

УТВЕРДЗИЦ ЧИСЛО БИВАТЕЛЬОХ

У „Комуналцу” гваря же гражданє нє муша основац скупштину квартельошох у колективних змесценьох, алє ше им таке совитує праве пре їх хасен. Предсидатель скупштини би могол точно утвердзиц число же кельо єст квартельошох у будинку, кельо єст членох у каждим обисцу, аж и у яким стану инсталациї.

Централни водомери то вшеляк новосц на хтору ше скорей лєбо познєйше буду мушиц шицки привикнуц, и хтора вшелїяк будзе запроведзена, а як будзе уплївовац на рахунки, то завиши лєм од гражданох, и од їх добрей дзеки най совит послухаю.

Руководитель Дїловней єдинки „Водовод и канализация” Мирослав Фейса гвари же на основи потераз окончених анализох утрати пре паушални способ наплацованя у колективним биваню, пейц одсто од вкупних утратох, кельо мал „Комуналац” прешлого року.

– На тот способ приходзиме до реалного обрахунку води за обисца, у дзепоєдних случайох и меншого паушалного задлужованя, як поведзме будинки на крижней драги Титовей улїци и uлїци Иви Лоли Рибара, у Блоку 106 и других будинкох – гвари Фейса.

Дзекуюци централним водомером, як и другим миром зменшованя утратох води зоз 40 одсто на менєй як 20 одсто, ЯКП „Комуналац” здобуло условиє же би вошло до дальшей фази проєкта подмирйованя зоз воду и канализациї у сотруднїцтве зоз Нємецку розвойну банку, хтори допринєше же би ше злєпшало водоподмирйованє.

ФОРМОВАЦ СКУПШТИНИ КВАРТЕЛЬОШОХ

Вербащанє ше поносую же им прето буду сциговац векши рахунки за воду, медзитим, праве дзекуюци мерачом могло би буц аж и наспак. Зоз тим новим способом мераня дошло би ше по реалнєйши обрахунок трошеня води у каждим обисцу. Медзитим, же би рахунки наисце були реални, кажди будинок би требал мац формовану скупштину квартельошох, а у Вербаше таки цела исную лєм у 15 будинкох, цо мали процент.

ПОВЯЗАНИ ТЕКСТИ