Керестурска и Школа з Попраду подписали Спорозуменє о сотруднїцтве

автор маф
937 Опатрене

РУСКИ КЕРЕСТУР – Основна и штредня школа з домом школярох „Петро Кузмяк” и Штредня фахова школа з Попраду у Републики Словацкей пияток, 7. авґуста, у шедзиску Националного совиту (НС) Руснацох у Руским Керестуре, подписали Спорозуменє о сотруднїцтве.

У мено керестурскей Школи спорозуменє подписала директорка Хелена Пашо Павлович, а спред Школи з Попраду директор Василь Кузмяк, котри дальша родзина учителя Петра Кузмяка, по котрим керестурска Школа ноши мено.

У делеґациї госцох зоз Словацкей на подписованю Спорозуменя були и подпредсидатель Пряшовского самоуправного краю (ПСК) др Петер Обримчак, посланїк у ПСК и началнїк Округу Стара Любовня Петро Сокол, директор Одбору за драги ПСК Владо Козак и Марґарета Ґайдошова спред Реґионалного одбору за медзинародне сотруднїцтво ПСК.

2-Skola-02

Попри спомнутей директорки керестурскей Школи и членїци НС Руснацох Пашо Павловичовей, госцом зоз Словацкей домашнї були и предсидатель Вивершного одбору НС Желько Ковач, предсидателька Одбору за образованє НС Мелания Римар, членїца того одбору Весна Раґаї-Цап, та член Одбору за службене хаснованє язика и писма НС Йоаким Грубеня.

Подписане Спорозуменє резултат закладаня обидвох бокох же би ше, попри у култури,  сотруднїцтво порушало и на полю образованя, а як визначел др Обримчак – и на полю економиї, цо оможлївює прешлого року подписанє Спорозуменє о медзиреґионалним сотруднїцтве АП Войводини и Пряшовского самоуправного краю.

По подписованю Спорозуменя госци и домашнї накратко нащивели и керестурску Школу дзе и биста дакедишнього першого школованого керестурского учителя Петра Кузмяка.

2-Skola-03

ПОВЯЗАНИ ТЕКСТИ