Керестурска парохия з госцами преславела Кирбай

автор маф
1.2k Опатрене

РУСКИ КЕРЕСТУР – Парохия св. оца Миколая у Руским Керестуре, зоз своїма госцами, з Архиєрейску Службу Божу на 10 годзин вчера преславела дзень преношеня мощох свойого нєбесного заступнїка св. о. Миколая – Кирбай. Як и кажди рок, богата була и вашарска часц Кирбаю.

Архиєрейску Службу Божу у катедралним храме предводзел преосвящени владика Георгий Джуджар, а сослужели петнац священїки – троме домашнї и з парохийох нашого Егзархату, з Крижевского владичества, а єден священїк бул и з Италиї.

Апостол читал домашнї дзияк Янко Виславски, Євангелию о. Владимир Седлак, а швичкаре були предсидатель Здруженя ремеселнїкох Владимир Емейди и член Здруженя Владимир Малацко. Попри домашнїх, на Служби було и надосц госцох з наших местох, як Керестурцох котри жию у блїзших и дальших жемох..

У казанї владика Георгий повинчовал Кирбай, та здогаднул на подобу св. Миколая, патрона нашей Катедралней Церкви. Владика визначел и Миколайово главни духовни характеристики – робиц добри дїла у таємносци, алє пре глїбши духовни хасен, цо приклад вирним и нєшка.

По Служби Божей бул одпустови обох коло церкви, хтори ше закончел з читаньом Євангелиї на шицких штирох бокох швета, а владика по каждим и пошвецел храм и присутних вирних.

Вонконцом Русинскей улїци спрам Косанчичу и того року була богата и барз нащивена вашарска часц Кирбаю, з найрижнороднєйшу робу и велїма забавнима бависками, насампредз на радосц дзецох и младих.

ПОВЯЗАНИ ТЕКСТИ