РУСКИ КЕРЕСТУР/НОВИ САД – Покраїнски секретар за образованє, предписаня, управу и национални меншини-заєднїци Михаль Нїлаш представел резултати трох конкурсох хтори розписани за набавку опреми за основни и штреднї школи, потим за школи хтори орґанизую формалне основне образованє за одроснутих и за установи школярского стандарду.
Основна и штредня школа з домом школярох „Петро Кузмяк” по конкурсу за набавку опреми достала 119 800 динари, а плановане купиц опрему до физкултурней сали.
По другим конкурсу – за набавку опреми за установи школярского стандарду, керестурски Дом школярох (интернат) достал 239 209 динари, за хтори до школскей єдальнї будзе купени окремни стол хтори отримує температуру єдлох, дознава Рутенпрес у Школи.
На представяню резултатох конкурсох Нїлаш гварел же за їх запровадзованє Секретарият того року розполагал з три раз менєй средствами як 2015. року.
За набавку опреми за основни школи опредзелєни вєдно 29 милиони динари, за штреднї школи 14 милиони 408 774 динари, а за основни школи хтори орґанизую наставу за одроснутих милион 900 000 динари. Понеже шицки апликанти хтори конкуровали за набавку опреми за установи школярского стандарду сполнєли условия конкурсу, їм розподзелєни 4 милиони 750 000 динари.