РУСКИ КЕРЕСТУР/ЗЕМПЛИНСКА ТЕПЛИЦА − Школяре осмей класи Основней школи и ґимназиї зоз домом школярох „Петро Кузмяк” зоз Руского Керестура, вовторок 8. януара одпутовали на тродньову Жимску школу до Земплинскей Теплици у Словацкей.
Одход софинансовали родичи школярох и Национални совит рускей националней меншини (НСРНМ), котри и орґанизатор того одходу. До Жимскей школи одпутовали 29-еро школяре, зоз своїма класнима старешинами Марию Балїнт и Оливеру Винаї, директорку Школи Хелену Пашо Павлович и представнїком НСРНМ Жельком Ковачом.
Керестурци у рамикох тей школи буду мац нагоду упознац ше и дружиц зоз домашнїма школярами, за нїх предвидзени рижни роботнї, алє и нащива вецей тамтейшим знаменїтосцом.
Жимска школа ше реализує уж треци рок за шором на основи подписаного Спорозуменя о сотруднїцтве медзи Руским Керестуром и Земплинску Теплицу котра ше дакеди тиж так волала Керестур.