РУСКИ КЕРЕСТУР – После свойого реґистрованя 31. марца, Шаховски клуб (ШК) Русин з Руского Керестура перше службене змаганє у Медзиопштинскей лиґи Зомбор одбавел внєдзелю, 8. мая у Керестуре процив єдней з двох наймоцнєйших екипох у тей лиґи – ШК Станишич зоз Станишичу. Русин страцел з 0,5:5,5, а пол бода (реми) вивойовал Рафаил Венчельовски.
Попри спомнутого Венчельовския, за Русин ше змагали Мирко Афич, Янко Катрина, Желько Будински, Звонко Медєши и Михайло Венчельовски.
У Медзиоштинскей лиґи Зомбор змагаю ше осем екипи и у ярнєй часци першенства буду одбавени штири кола, так же будзе закончена концом мая. Єшеньска часц почнє початком септембра.
После першого кола Русин за тераз на осмим, остатнїм месце, а шлїдуюце змаганє керестурски шахисти бавя у Липару, процив тамтейшей истоменей шаховскей екипи.
Шаховски клуб Русин знова реґистровани после дзевецрочней павзи, а на инициятиву Михайла Венчельовския, Бориса Варґу и Йоакима Гардия. За тераз уж єст прейґ 20 старших шахистох, а основана и дзецинска секция.
До Клубу можу присц шицки заинтересовани (котри нє муша участвовац и на службених змаганьох), сходза ше штварток на 20 г. у просторийох СД Русин у Старей школи, а з дзецми ше роби вовторок, тиж на 20 годзин.