КУЛА – Представителє школярох Штреднєй школи „Петро Кузмяк”, з педаґоґиню Любицу Няради, вчера нащивели Општинску орґанизацию Червеного крижу у Кули, до чиєй инклузивней дзецинскей заградки однєсли дарунки зоз своєй гуманитарней акциї.
Керестурци нащивели и дзецинску заградку за инклузию предшколских и дзецох основношколского возросту з ромскей заєднїци и дзецох зоз социялно загрожених фамелийох при Червеним крижу. Тота дзецинска заградка роби од 2004. року, як проєкт є финансована з Данскей, а до нєй уключени и даскельо дзеци з Керестура.
Домашнї госцох упознали зоз свою роботу, єдна школярка виполнєла и приступнїцу за волонтера Червеного крижу, а порадзене и о дальшим сотруднїцтве з керестурску Школу.