Керестурци нєшка на Войводянским младежским фестивалє

автор зам
1.1k Опатрене

КУЛА – У Кули нєшка, 7. мая, будзе Седми Войводянски младежски театрални фестивал, того року наволани „Младежски театрални маратон”, понеже у сали Културного центру почнє на 16, а будзе закончени на 23 годзин.

На Фестивалє участвую пейц тетрални витвореня младих ґлумцох, медзи нїма и з Руского Керестура, а почнє з представу „Гамлет, римейк” С. Басари, у режиї Ґордана Лукича, а у виводзеню Креативного студия и Театру „Ґартел” Мачванска Митровица/Сримска Митровица.

Друга по шоре будзе представа Керестурцох з Драмского студия АРТ Дому култури – „Сезона лову на ловара” О. Витера, у режиї Владимира Надя Ачима, а после нєй наступя аматере з Театру „Бранислав Нушич” зоз Шиду, з представу „Портрет малиґней клїтинки” Цветина Аничича, котри и єй режисер.

При концу буду виведзени представи „Алетернативни професоре”, по тексту и у режиї Предраґа Ковачевича, а у продукциї Драмскей секциї Штреднєй технїчней школи „Никола Тесла” зоз Сримскей Митровици и „Зла жена” Й. Стериї Поповича, у режиї Весни Раткович и Мариї Станисавлєвич, а у виводзеню Драмскей секциї Штреднєй фаховней школи „Васа Пелаґич” з Ковину.

Войводянски младежски театрални фестивал орґанизую Союз аматерох Войводини, Културно-просвитна заєднїца Општини Кула и Културни центер Кула, а под покровительством Општини Кула.

ПОВЯЗАНИ ТЕКСТИ