СИВЕЦ – Младежска ґрупа Драмского студия „АРТ” рускокерестурского Дому култури з представу „Сезона лову на ловара” Олександра Витера, у режиї Владимира Надя Ачима, нєшка участвує на Општинскей смотри театралней творчосци драмских аматерох з кулскей општини, у Сивцу.
Смотра, 70. по шоре, остатнї роки з назву „Велимир Сандич Велько”, почала прешлого викенду, а будзе закончена на ютре, 27. марца. Того року ше на Општинскей смотри змагаю лєм штири представи, а оценює их селектор Давид Кецман зоз Зомбора.
Смотру на ютре, на нєдзелю, завру аматере з Културного центру Кула, з представу „Подозрива особа” Бранислава Нушича, у режиї Драґана Остоїча, а прешлого викенду одбавени два представи – „Дзивка з трома оцами”, Брану Црнчевича, у режиї Максима Мудринича, аматерох зоз Сивцу и „Чудо у Шарґанє” Любомира Симовича, у режиї Радоя Чупича, драмских аматерох з Червинки.
Представи на Општинскей смотри починаю на 20 годзин.