Керестурци нєшка на Соборе народней творчосци Сербиї

автор зам
808 Опатрене

РУСКИ КЕРЕСТУР/ПЕТРОВЕЦ НА МЛАВИ – Ансамбл Дому култури Руски Керестур нєшка, 17. октобра, участвує на 43. Соборе народней творчосци Сербиї у Петровцу на Млави, як найвисшим фестивалє у тей обласци у держави. Керестурски єден з пейц ансамблох-ґрупох хтори представяю Войводину на Соборе, а з кулскей општини на Соборе участвує и ансамбл КУД „Србия” з Кули.

Дом култури ше на Собор пласовал з танцом „Вербунґ на Горнїци” Танєчней ґрупи ветеранох, у хореоґрафиї Ґабриєли Саянкович. У танєчней точки участвує и Хлопска шпивацка ґрупа и Тамбурови оркестер Дому култури, под руководительством Юлияна Рамача Чаму. КУД „Србия” з Кули на Соборе участвує з приказом танцох з Бачкей.

Як плановане, на 15 годзин будзе отримани дефиле шицких учашнїкох, а потим на 15,30 г. на отвореней сцени у Петровцу на Млави почина главна програма, на хторей наступя найквалитетнєйши жридлово танєчни и шпивацки ґрупи, вокални солисти и инструменталисти на старих инструментох. У случаю подлей хвилї, програма будзе у Спортскей гали.

Собор народней творчосци Сербиї будзе закончени з музичну програму „Балкански мотиви” (на 19 г.), на хторей наступя Хор и Народни оркестер Радио-телевизиї Сербиї.

Петровец на Млави шедзиско истоменей општини у восточней Сербиї на схилох Гомольских брегох и у долїни рики Млави, у 34-ох населєньох општини жию коло 46 440 жителє, а припада Браничевскому округу.

Собор народней творчосци Сербиї орґанизую Союзу аматерох Сербиї и Културно-просвитни центер Петровец на Млави, а покровителє манифестациї Општина Петровец на Млави.

 

1-Sobor-02

ПОВЯЗАНИ ТЕКСТИ