РУСКИ КЕРЕСТУР – Руски Керестур вчера нащивела делеґация Министерства школства, науки, виглєдованя и спорту Словацкей Републики, у хторей були державни секретар Министерства Петро Крайняк мл. и шеф його Канцелариї Миро Осифчин. Функционере Министерства Словацкей до Керестура пришли пред ютрейшу службену нащиву Министерству просвити, науки и технолоґийного розвою Влади Сербиї у Беоґрадзе, дзе буду бешедовац о сотруднїцтве на єдним заєднїцким проєкту.
Крайняк и Осифчин Керестур нащивели и як декларовани Русини, активни у русинским руху Словацкей, а перше обишли Школу „Петро Кузмяк”, дзе их дочекала директорка Хелена Пашо Павлович зоз сотруднїками и дзе ше упознали з местом тей Школи у образовней системи Сербиї, та вичерали искуства.
Госци потим нащивели Руску Матку, дзе их з даскелїма членми Матки приял єй предсидатель Дюра Папуґа, и у приятельскей розгварки бешедоване о актуалносцох у русинским руху.
У шедзиску Националного совиту (НС) Руснацох делеґацию зоз Словацкей привитали предсидатель Вивершного одбору НС Желько Ковач и секретар Совиту Таня Арва Планчак, упознали их з орґанизацию националних меншинох у Сербиї прейґ НС-ох, як и з обласцами и дїялносцу нашей културней самоуправи.
Нащиву Керестуру закончели на парохиї св. оца Миколая, дзе з парохом о. Михайлом Малацком бешедовали о духовним и вирским живоце найвекшей рускей парохиї у Сербиї.
Госци зоз Словацкей потим нащивели и грекокатолїцку парохию и манастир оцох Василиянох у Кули, а нєшка пребуваю у Новим Садзе.