РУСКИ КЕРЕСТУР – У рамикох проєкту „Парняцки караван интеркултуралней едукациї”, хтори того року облапел штредньошколцох зоз штирох местох, а медзи нїма и керестурских, всоботу, 7. новембра нащивел и Руски Керестур.
Проєкт ше отримує уж штварти раз, орґанизує го здруженє „Гумана – дружтво за потримовку дзецинству и младосци” зоз Бачкей Паланки, а потримує Покраїнски секретарият за образованє, предписаня и национални меншини – национални заєднїци.
У Руским Керестуре домашня Каравану була професорка руского язика у Штреднєй школи „Петро Кузмяк”, Люпка Малацко, а о историї, култури, вири и обичайох Руснацох, учашнїки дознали кед нащивели катедралу св. Миколая дзе их о шицким поинформовал и парох о. Михайло Малацко. Керестурску ґимназию хтора други раз учашнїк проєкту, тераз представяли школяре Корнелия Будински, Єлена Фейди и Дарко Провчи.
Того року з проєктом облапени штири места, Бачки Петровец, Сримски Карловци, Будисава и Руски Керестур, и з тих местох коло 20 младих, штредньошколцох. У Бачким Петровцу млади ше упознали зоз животом словацкей заєднїци, у Карловцох сербскей, а у Будисави мадярскей националней заєднїци.
Як наглашели орґанизаторе проєкту Наташа Круль и Стефан Штрбац, учашнїки Каравану у своїх школох парняком маю пренєсц тото цо научели о националних заєднїцох котри нащивели.