РУСКИ КЕРЕСТУР – После трох рокох як поцагана ґазна мрежа по валалє и збудована Главна мерна реґулацийна станїца (ГМРС), вчера, 13. новембра, и урядово пущени ґаз по Руским Керестуре. Практично, ґаз до керестурскей мрежи пущени дзень пред тим, после службеного примопридаваня медзи Сербияґазом и його Оддзелєньом дистрибутивного центру Кула.
Главну мерну, хтора источашнє и мерна реґулацийна станїца за широке трошенє – за ґаздовства и привредни и други субєкти (за каплїцу) – вчера нащивели представителє Оддзелєня дистрибутивного центру Сербияґазу у Кули, як и чолнїки Месней заєднїци – предсидатель Совиту Владимир Олеяр и секретар МЗ Михайло Сабадош.
Ґаз приходзи з маґистралного ґазоводу Кула-Оджак, у нїм прицисок 36 бари, а у керестурскей ГМРС ше го редукує за широке трошенє. Єден крак идзе за индустрийну зону, а други за коло 2 200 ґаздовства у Керестуре. Ґазна мрежа у валалє длугока 56 километри.
Як Рутенпрес дознава од инженєра у кулским Оддзелєню дистрибутивного центру Сербияґазу Бранислава Живановича, за тераз приключок за ґаз уплацели коло 10 керестурски ґаздовства. Обчекую же тераз, кед ґаз пущени до мрежи, будзе и вецей заинтересованих за приключованє, нє лєм пре зогриванє, алє и друге хаснованє ґазу.
Тиж так, як гварел Живанович, у Сербияґазу обечкую же на зогриванє на ґаз прейду и валалски явни подприємства и установи, дзе даєдни за тото уж маю и потребни дозволи, алє и заградкаре за зогриванє пластенїкох, цо визначели як його предносц.
Цена приключку 117 068 динари и муши ше виплациц нараз. За ґаз треба мац и окремни пец, лєбо за тото оспособени, а за приключок на ґаз ше треба приявиц до Кули, до Оддзелєня дистрибутивного центру Сербияґазу, на телефони 728-033, 729-021 и 729-640.
