ОСИЄК – У Осиєку вчера, 30. октобра, у церкви Христа Царя преславене храмове швето-Кирбай, а Архиєрейску Службу Божу предводзел крижевски владика, кир Никола Кекич, котрого пред початком Служби у мено парохиянох привитала Хана Пешо и подаровала му букет квеца. Сослужели парох з Канїжи о. Никола Ступяк, фра Золтан Дукаї з францисканского манистиру у Осиєку, фра Анто Перван, ґвардиян капуцинского манастиру у Осиєку и домашнї парох о. Любомир Стурко. Апостол шпивала ш. Лаврентия, а Євангелию читал о. Никола Ступяк.
Владика Кекич ше у своєй казанї огляднул на початки преслави швета Христра Царя, на потребу же би Царство Боже зажило у каждому чловекови, а окреме наглашел же християн длужни ослуховац Божо слова и жиц по Божих заповидох. Тиж потолковал же Царство Боже, преложене на нєшкайши, сучасни язик значи же то цивилизация любови, бо Бог то любов и любов нам дава, а нас поволує же бизме ю ширели медзи своїма ближнїма.
Попри векшого числа шестрох Василиянкох, на Служби було и красне число вирних и їх госцох, та каплїца Христа Царя у Осиєку була подполно виполнєта. На Служби шпивали шестри Василиянки, а на концу владика мировал.
По Служби у порти каплїци парохиянє и їх госци ше дружели з владиком, священїками и шестрами, а шестри Василиянки за шицких пририхтали послуженє.