НОВИ САД – Промоция нових кнїжкох о. др Романа Миза „Священїки дакедишнього осєцкого викарията”, „Шпиванє у Византийскей Церкви”, „Святи тайни Церкви” и „Исус и ми” отримана всоботу, 17. децембра, у Руским културним центре (РКЦ) у Новим Садзе.
О кнїжкох бешедовали парох керестурски о. мр Михайло Малацко, историчар проф. др Янко Рамач, Микола М. Цап, Микола Шанта, автор о. др Миз, а у дискусиї и парох новосадски о. Юлиян Рац и Велимир Паплацко.
У квалитетней музичней програми наступели Хор „Гармония”, под дириґентством Весни Кесич Крсманович, та солистки Ана Римар и Гелена Папуґа, котру на ґитари провадзел Димитрий Цап.
– Паноцово кнїжки, написани як учебнїк, нам помагаю похопиц яке богатство маме як грекокатолїки, медзи иншим и музичне, и же бизме систематично упознали себе – гварел на промоциї о. Михайло Малацко, а историчар др Рамач похвалєл приказ наших паноцох од 1777. року, алє и историї парохийох и дружтвено-економски одношеня.
Бешедуюци на промоциї, сам автор о. др Роман Миз на початку гварел же му мило же му на писаню повинчовал и митрополит Ян Бабяк зоз Словацкей.
На концу програми новосадски парох о. Юлиян Рац подзековал авторови же роби на хасен Церкви и людзох, а скаути зоз Закарпатя з України на промоцию принєсли вифлеємски огень за нашу церкву у Новим Садзе, так же вирни котри то жадаю, огень у церкви можу превжац за свойо обисца.
На промоциї, хтора закончена з друженьом у Церковней сали и аґапеом, могло купиц кнїжки о. др Романа Миза, як и кнїжки у виданю НВУ „Руске слово”.
Орґанизаторе промоциї були Културна рада Грекокатолїцкей парохиї св. апостолох Петра и Павла и РКЦ Нови Сад. Видавателє кнїжкох Грекокатолїцка парохия св. апостолох Петра и Павла у Новим Садзе и Друкарня и видавательна хижа „Максимаґраф” з Петроварадину.