У фодбалским клубе „Искра” у Коцуре бавя вецей дзецински ґрупи фодбалерох. За фодбал при хлапцох звичайно од малючка вельке интересованє, та так и у Коцуре коло 25 хлапци поряднє ходза на тренинґи, ґу тренерови Желькови Салонтайови.
– Уж рок и пол тренирам хлапцох, скорей сом тренирал дзивоцку ґрупу. Кед у питаню дзеци, у клубу маме пионирох од 2002. по 2004. рок, потим маме когуцикох од 2005. по 2007. рок, а тераз маме и младших, по 2009. рок, медзитим, часто дзеци бавя и зоз старшима и зоз младшима – гвари Желько.
Дзеци маю тренинґи два раз лєбо три раз тижньово, и през тидзень вше маю даяке змаганє дома лєбо у даєдним околним месце. Рочнє дзеци одбавя коло 20 змаганя. Желько окреме задовольни зоз когуциками хтори того року посцигли добри резултати – треце место на турнире у Червинки на трави, и два други места на бетону, у Червинки и у Руским Керестуре. Тренер ше цеши же тота ґрупа, гоч составена зоз бавячох розличних рокох и схопносци у фодбалу, посцигла таки добри резултати процив наисце моцних екипох як цо поведзме екипа з Бечею лєбо Апатину. Хвильково ше бави турнир у Змаєве на хторим за тераз маю єдну побиду и єдно страцене змаганє, и обчекую добри конєчни резултат.
ЗНАХОДЗА ШЕ САМИ
Проблеми зоз хторима ше стретаю финансийней природи. Шицко на добродзечней основи, и тренинґи, и здобуванє опреми, лабди вецейраз приноша з дому, а и за превоз ше сами знаходза.
– Дзеци би любели же би кажди дзень було даяке змаганє. За змаганя ше знаходзиме сами, кед идземе даґдзе вонка з валалу, дахто од родичох вожи, лєбо идземе на комбию. Кед бавиме дома, вше дахто од родичох вежнє даяку фляшу соку лєбо даяки „Бананки”, купи по плєскавицу дзецку, мило ми же єст родичох хтори ше сцу уключиц и помогнуц. Гоч можебуц нїхто з нїх нє будзе бавиц фодбал док вирошнє, алє буду людзе. Най ше дзеци розвиваю, учиме их най иду вше напредок, най ше боря за себе. Я им вше гварим же най бавя як кед би бавели прави першенствени змаганя, вец и вони так похопя и наисце ше трудза, бо кажде змаганє важне – гвари Желько.
ДЗЕЦИНСКА ЛИҐА
Попри того, вельки проблем и же Општина Вербас нє ма свою лиґу.
– Щесце же маме пайташох хтори робя з дзецми у других местох, та з нїма бавиме. Хтори екипи ше змагаю у лиґи єден дзень бавя лиґу, а други дзень бавя з нами. Писани ту и вшелїяки петициї и подобне, медзитим нїч ище нє порушане по тим питаню. Вшелїяк же би нам ше з тим отворели и иншаки можлївосци – прешвечени Желько.
