РУСКИ КЕРЕСТУР – Пред заєднїцку схадзку з Одбором за културу Националного совиту Руснацох, вчера у Руским Керестуре отримана 12. схадзка Управного одбору (УО) Заводу за културу Войводянских Руснацох (ВР), на хторей бешедоване о активносцох Заводу медзи двома схадзками, о унапредзованю стану у нашей култури у 2015. року, а прилапени и звити о роботи и финансийох у 2014. року. На схадзки присуствовали шесцеро з дзевец членох УО и директор Заводу Серґей Тамаш.
Бешедуюци о активносцох Заводу медзи двома схадзками, Тамаш пренєсол позитивни упечатки о орґанизациї Централней преслави Националного швета Руснацох у Вербаше, а членох УО поинформовал же Завод од децембра 2014. дотераз конкуровал на осем конкурси на городским, републичним и иножемним уровню. Єден зоз значних проєктох у тим року би мало буц снованє Приручней библиотеки, а наявел же у марцу и априлу буду отримани фахово роботнї и семинари на хторих буду заступени млади Руснаци.
Понеже закончени конкурс за нови драмски тексти хтори вєдно розписали РНТ „Петро Ризнич Дядя”, Завод и НВУ „Руске слово”, до фаховей комисиї за оценьованє текстох УО спред Заводу за културу ВР меновал режисера Владимира Надя Ачима.
У 2014. року Завод за културу ВР апликовал на 12 конкурси, алє реализовал милион и 800 000 динари менєй як заплановане, понеже нє достати средства зоз шицких конкурсох дзе конкуроване. Як найуспишнєйши проєкти визначени Кодификованє руского народного облєчива и танцох, Лєтня школа, односно преподаванє хторе отримане у октобре 2014. року, як и сотруднїцтво з Радио-телевизию Войводини.