КОЦУР – На Роботней акциї младих „Дай и ти свою руку”, хтору през викенд у Коцуре орґанизовало Коцурске здруженє младих, участвовали коло 100 акцияше, найвецей з Коцура, алє и з Руского Керестура, Дюрдьова, Вербасу, Кули, Нового Саду, Беоґраду, Селенчи, Марадику, Краґуєвцу, аж и з Канади, а роботна часц отримана всоботу, 23. юлия.
Подзелєни до вецей ґрупох млади на вецей местох у Коцуре жительом фарбели огради, зберали шмеце, ушорйовали желєни поверхносци, помагали у обисцох и друге.
Всоботу пополадню ше змагали у одбойки, кошарки и фодбалє, а свойо уметнїцки схопносци випробовали на креативних роботньох, на хторих участвовали и дзеци з окремнима потребами з коцурского Каритасу.
З молитву и шпиваньом, з назву „Три вири у єдней шкатули”, всоботу отримана и духовна медитация у римокатолїцкей церкви, а по законченю урядових активносцох, учашнїки орґанизовано були на ноцним купаню на базену у Центре за физичну културу у Вербаше.
Вчера, внєдзелю, акцияше присуствовали на службох Божих у православней, римокатолїцкей, лєбо грекокатолїцкей церкви, а потим вєдно нащивели Войов салаш дзе мали одпочивок, цо була и остатня активносц тогорочней Акциї младих „Дай и ти свою руку”.