БЕОҐРАД – Коло 3 500 осмаки ше нє уписали до штреднїх школох, коло 90 з нїх остали ище нєрозпоредзени и коло 900 буду покладац закончуюци испит у авґусту, виявела концом прешлого тижня помоцнїца министра просвити Снежана Маркович.
– За даєдних нє знаме прецо нє вимагали же би були уписани, даєдни одступели, пошли до иножемства, даєдни уписали приватни школи – гварела Марковичова за РТС и додала же по першим жаданю уписани два трецини дзецох.
Найвекше интересованє було за фахи з обласци информацийних технолоґийох и технїчни школи у тей обласц поставаю вше популарнєйши, гварела помоцнїца министра просвити и додала же вельке интересованє було и за медицински школи. Зменше интересованє и за ґимназиї и економски школи, а понеже у нїх єст шлєбодни места, оддзелєня годни буц пополнєти у трецим уписним кругу.
Зменшало ше и интересованє за економски школи. Марковичова гварела же ше до школох за котри нєт вельо заинтересованих, як и у оддзелєньох дзе число школярох менше од нєобходного, годни уписац школяре у трецим уписним кругу, хтори будзе закончени 31. авґуста.