РУСКИ КЕРЕСТУР – Композиция „Кура и вайцоˮ, авторки Танити Ходак, победзела на тогорочним 51. „Червеним пупчуˮ, музично-танєчней манифестациї дзецох, хторе отримане вчера вечар на лєтнєй бини у дворе Основней школи „Петро Кузмяк”, а з хтору почал тогорочни 58. Фестивал рускей култури „Червена ружаˮ.
Того року на „Пупчу” виведзени лєм три нови композициї, першонаградзена шпиванка „Кура и вайцо” достала и награду за текст, а интерпретовали ю Исак Новта, Силвия Папуґа и Станислава Новакович, шицки з Керестура.
Другонаградзена шпиванка „Мижо трактористаˮ авторох Марини Роман и Владимира Дудаша, а виведли ю Сара Гарди, Лана Шомодї и Тияна Бучко. Трецу награду достала композиция „Диєта” авторки Наташи Фейди и авторки тексту Ирини Гарди Ковачевич, хтору вишпивали Иван Фейди, Ребека Сабадош и Сташа Малинович, а шицки шпиваче з Руского Керестура. Аранжмани и матрици за композициї виробел Мирослав Пап.
Попри нових, на тогорочним „Пупчу” виведзени ище седем найпопуларнєйши шпиванки зоз скорейших „Пупчохˮ хтори попри Кристини Ковач з Нового Саду виведли и Дзецинска шпивацка ґрупа КУД „Тарас Шевченко” з Дюрдьова, солисти зоз Дзецинского хору „Шкорванчки” Дому културу Руски Керестур, а хтори их провадзел под руководзеньом Лидиї Пашо.
„Шкорванчкиˮ виведли и гимну манифестациї „Нашо швето” и закончуюцу шпиванку „Тисяч радосци”, два народни шпиванки виведла и Ґрупа школярох першей класи ОШ „Петро Кузмякˮ, а традицийно на початку з двома шпиванками наступели и наймладши керестурски дзеци з Музичней оводи.
Попри шпивацких точкох, наступели и фолклорни секциї вецей ґрупох наймладших танцошох з наших културно-уметнїцких дружтвох з Вербасу, Дюрдьова, Коцура, Бикич Долу, госци зоз Горватскей зоз Миклошевцох, як и домашнї з Дому култури Руски Керестур.
Нови композициї оценьовал фахови жири у составе Наталия Зазуляк, Таня Кнежевич, Лиляна Барна Никитович и Владимир Семан Зеро. Конферансу водзели школярки Ема Живкович, Яна Варґа, як и Марина Надь и Емилиян Няради, а зложела ю Ивана Дудаш хтора була и руководителька манифестациї
Вецей фотоґрафиї мож опатриц у нашей фотоґалериї.