Композиция „Чаривни сни” побиднїк „Пупча”

автор маз 
1.2k Опатрене

РУСКИ КЕРЕСТУР – Шпиванка „Чаривни сни”, за хтору мелодию и текст написала Даниєла Горняк зоз Сримскей Митровици, преглашена за найлєпшу на 48. музично-танєчней манифестациї дзецох „Червене пупче” на тогорочним Фестивалє рускей култури. Ґу тому, Горнякова достала и награду за найлєпши текст (за спомнуту шпиванку), а на „Пупчу” ю виведла Надя Каурин, тиж зоз Сримскей Митровици.

На „Пупчу”, хторе отримане всоботу, 1. октобра, у конкуренциї нових композицийох були дзешец шпиванки, а другу награду достала композиция Марини Роман „На кирбаю”, за хтору текст написал Владимир Дудаш, а хтору виведли Елеонора Дудаш и Ивана Фейди з Руского Керестура. Трецонаградзена комозиция „Нїч нє прескочим”, чийо ноти написал Юлиян Рамач Чамо, на текст Меланиї Римар, а одшпивали ю Иґор Папуґа и Борис Жирош, тиж з Керестура. За шицки три наградзени шпиванки аранжман виробел Мирослав Пап.

Попри побиднїкох, зоз своїма новима шпиванками на „Пупчу” участвовали Наташа Фейди, Ана Бучко, Владимир Дудаш, Оксана Рамач, Маґдалена Горняк Лелас, Михаил Рамач и Весна Медєши, на тексти Миколи М. Кочиша, Агнети Папгаргаї, Владимира Дудаша, Меланиї Римар, Мариї С. Горняк, Михаила Рамача и Весни Медєши.

Нови композициї шпивали Леонела Цифрич, Марина Джуджар и София Семан, дуети Дорияна Пап и Даница Плавшич, Александар Зорич и Павле Венчельовски, Елена Шомодї и Анита Чизмар, Матей Шепински и Иван Рац, Теодора Русковски и Йована Казак – шицки з Керестура, дует Кристина Будински и Аґита Ковач з Вербасу, и горе спомнути виводзаче побиднїцких. Аранжмани за шицки нови композициї за дзеци написали Юлиян Рамач Чамо и Мирослав Пап, котри за нїх виробел и матрици.

Шпивачох провадзел Дзецински хор „Шкорванчки” Дому култури Руски Керестур, на чолє з дириґентку Лидию Пашо. „Шкорванчки” и отворели тогорочне „Пупче” з традицийну шпиванку „Нашо швето”, а заварли го з „Тисяч радосцами”.

На початку манифестациї з двома шпиванками наступела и ґрупа Музичней оводи з Керестура, под руководительством Танї Фейди.

Нови композициї и тексти за нїх оценьовал фахови жири, у составе – Геленка Гарвильчак, Таня Орсаґ и Владимир Малацко.

У другей часци програми на 48. „Пупчу” з по єдним, лєбо вецей танцами, наступели руски дзецински ансамбли з наших местох у Сербиї и Горватскей – з КПД „Карпати” з Вербасу, Дому култури Руски Керестур, КУД „Яким Ґовля” з Миклошевцох, КУД „Тарас Шевченко” з Дюрдьова, КУД „Петро Кузмяк” з Нового Орахова, Руского културного центру з Нового Саду и КУД „Жатва” з Коцура.

Числених нащивительох шицких ґенереацийох през програму „Червеного пупча” водзели школяре ОШ Ребека Семан и Павле Венчельовски, руководитель манифестациї бул Михайло Зазуляк, а конферансу написала Ивана Дудаш.

(Вецей фотоґрафиї з „Пупча” уж обявени у окремней ґалериї на правим боку сайту „Руского слова” и Рутенпресу).

ПОВЯЗАНИ ТЕКСТИ