Конвенция за Срим лїстини „Союз за лєпшу Сербию”

ШИД – У Културно-образовним центре Шид вчера отримана централна конвенция за Срим виберанковей лїстини под числом седем за републични виберанки „Борис Тадич, Чедомир Йованович-Союз за лєпшу Сербию-Либерално демократска партия, Лиґа социялдемократох Войводини, Социялдемократска странка”.

На конвенциї представени кандидати за одборнїкох до Скупштини општини Шид з Лиґи социялдемократох Войводини (ЛСВ), Социялдемократскей странки (СДС) и Либерално демократскей партиї (ЛДП), як и кандидати за републични виберанки тих странкох зоз Сриму. Зоз Шиду то Наташа Цвєткович и Желько Брестовачки зоз СДС.

На конвенциї бешедовали лидере спомнутих странкох – Чедомир Йованович (ЛДП), Ненад Чанак (ЛСВ) и Борис Тадич (СДС).

Чедомир Йованович наглашел же чежки стан у привреди, польопривреди, здравстве, просвити и других обласцох живота, же людзе худобни и прето поволал най 24. априла подумаю на себе и своїх найблїзших и потим гласаю. Запитал ше и хто станє пред Шешеля и зопре його екстремизем и як гварел – то праве їх лїстина под числом седем.

Ненад Чанак поручел присутним же Лиґаше 26 роки запровадзую дошлїдну политику и повторел же людзе маю одлучовац там дзе жию, як и „же зме ту же бизме оталь нє пошли, алє ту остали”.

Борис Тадич наглашел же ше лєпше жило под члас Влади Мирка Цветковича, а же терашня власц зменшала плаци и пензиї и же нєшка у Сербиї єст 630 000 подполно худобних людзох. Тадич окреме наглашел же под актуалну власцу при людзох панує страх од худобства, траценя роботного места, хороти, же нє буду мац можлївосци лїчиц ше. На концу викладаня поручел же треба вериц до шлєбоди и Европи и же кажде „ма вибор”.