Конкурс за финансованє програмох и проєктох за пензионерох, у нїм и за дотациї з керестурского самодоприносу

автор маф/зам
873 Опатрене

КУЛА – Општина Кула 8. септембра розписала Явни конкурс за додзельованє средствох за финансованє програмох и проєктох здруженьох пензионерох и здруженьох гражданох у обласци защити особох з инвалидитетом. Конкурс тирва по 30. септембер.

За тоти намени у тим року обезпечени милион 225 000 динари, а конкурс ше одноши и на средства зоз самодоприносу у Руским Керестуре, хтори Совит Месней заєднїци опредзелєл за дотациї у суми од 275 000 динари.

За спомнути пенєж з програмами/проєктами можу конкуровац Здруженє пензионерох, здруженя гражданох хтори ше занїмаю зоз защиту особох з инвалидитетом и здруженя хтори ше занїмаю зоз социялно-гуманитарну роботу у обласци защити и помоци пензионером, односно особом з инвалидитетом. Шедзиско тих здруженьох муши буц у Керестуре.

По Конкурсу 700 000 динари опредзелєни за финансованє програмох/проєктох здруженьох гражданох з обласци защити особох з инвалидитетом, а 250 000 динари за финансованє програмох/проєктох здруженьох пензионерох. Средства ше нє одноша на набавянє ортопедских помагачкох, апаратох за регабилитованє, лїкох и за други права хтори ше витворює з обласци социялного осиґураня.

Учашнїки на Конкурсу муша буц уписани до реґистру у складзе зоз законом и мац шедзиско на териториї кулскей општини. Кед им шедзиско у другей општини, вец ше програми/проєкти з хторима ше конкурує, муша одношиц на гражданох кулскей општини и у нєй муша буц витворени.

Конкурс и прияви за ньго находаза ше на веб-сайту Општини Кула – www.kula.rs   Прияви з комплетну документацию треба придац на Писарнїцу Општинскей управи.

ПОВЯЗАНИ ТЕКСТИ