НОВИ САД – У Покраїнскей влади конституовани Одбор за означованє Рациї у Бачкей, на чолє з епископом бачким Иринейом и предсидательом Покраїнскей влади Иґором Мировичом, чий задаток будзе орґанизованє спомину на Сербох, Єврейох, Ромох и других котри у януаре 1942. року страдали у Рациї мадярских фашистох у южней Бачкей.
У Одборе и представителє општинох у хторих була Рация, представитель Мемориялного дружтва „Рация 1942”, а на схадзки констатоване же означованю таких траґичних подїйох о хторих ше менєй зна треба дац вецей уваги. Прето ше кажди рок у януаре, окрем традицийного означованя Рациї у Новим Садзе, и у других местох у Бачкей буду отримовац централни спомини.
Рация почала 4. януара у Чуроґу, а потим є предлужена у Ґосподїнцох, Шайкашу, Дюрдьове, Мошорину, Тителю, Локу, Ґардиновцох, Вилову и Жаблю. У 17 местох Шайкашскей обласци страдали 2 355 особи, у Новим Садзе страдали ище 1 246 особи, а у Бечею, дзе Рация закончена, ище 215 особи, так же вєдно у Рациї страдали коло 3 800 особи.
Нарок буду означени 75 роки тих страданьох, а централна подїя будзе у Чуроґу.