НОВИ САД – Перша схадзка Скупштини АП Войводини у новим зволаню будзе отримана на штварток, 2. юния, а конститутивну схадзку заказал терашнї предсидатель Скупштини Иштван Пастор.
На першей схадзки буду потвердзени мандати покраїнским посланїком, вибрани предсидатель и подпредсидателє Скупштини, меновани ґенерални секретар Скупштини, формовани посланїцки ґрупи, а можлїве же буду формовани и роботни цела Скупштини.
Войводянски парламент ма 120 посланїкох, а найвецей мандати на виберанкох 24. априла достала лїстина Сербскей напредней странки – 63, потим лїстина Социялистичней партиї Сербиї и Єдинственей Сербиї 12, коалиция коло Демократскей странки, як и Сербска радикална странка достали по 10 мандати; Лиґа социялдемократох Войводини 9, лїстина „Досц було-Саша Радулович” 7, Союз войводянских Мадярох 6, Мадярски рух за автономию 2 и єден мандат Желєна странка.