Контраченє за ярню шатву у Керестуре

автор сен
1.2k Опатрене

РУСКИ КЕРЕСТУР – Гоч найтуньше плациц у готовим, векшина польопривреднїкох нє може нараз вифинансовац набавку нашеня, защитних средствох и штучного гною, та ше опредзелюю за контраченє. У Руским Керестуре польодїлски култури контрача подприємства „Аґрохома”, „Юарбис” и „Аґрокерестур”.

„Аґрохома” контрачи жито, сою, слунечнїк и кукурицу, а як гварел Славко Малацко з того подприємства, найтуньше прейду парасти котри задлуженє враца у юнию, после тлаченя жита. Друга катеґория то врацанє длуства у септембру, у сої и слунечнїку, а треца, найдрагша, у октобру, кед ше враца у кукурици.

„Аґрокерестур” ище у фебруару почал контрачиц сою, кукурицу и жито, прешлого тижня и слунечнїк, а условия тиж завиша од часу врацаня, по контракту.

– Кед ше за штучни гной задлуженє враца у житу, вец то 395 еври, кед у сої, лєбо слунечнїку, вец 405, а у кукурици 410 еври. Кед ше уреу купи у готовим пенєжу кошта коло 340 еври, а кед ше ю законтрачи за кукурицу, то параста на концу винєше 410 еври, за 70 вецей – гварел Иґор Варґа з „Аґрокерестура”.

„Юарбис” тераз контрачи сою и слунечнїк, за цо того року вироятнє будзе вецей интересованя понеже людзе досц розчаровани пре нїзку цену жита и кукурици, гварел Владимир Тамаш з „Юарбису”.

ПОВЯЗАНИ ТЕКСТИ