КОЦУР – Културно просвитне дружтво „ДОК” з Коцура того викенду орґанизує ювилейни, Дзешати Фестивал гумору и сатири „Коцурска чутка”. Програма будзе 27. и 28. новембра у Доме култури у Коцуре, як и у валалскей Читальнї и Огньогасним доме.
На Фестивалє на пияток, 27. новембра будзе представена двоязична кнїжка (по сербски и по руски) афоризмох, карикатурох и рецептох за єдла з кукурици „Златни заренка веселосци” Александра Деветка, а на соботу, 28. новембра, после дзецинскей програми „Чуточка”, будзе отримана „Коцурска чутка”.
Обидва днї Фестивалу буду виведзени и театрални представи – на пияток монодрама на сербским язику „Перша малженска ноц” Миодраґа Караджича, у виводзеню Михайла Воїновича, хтору режирал Радоє Раонич, а на соботу представа „Круцина” Танкреда Дорста, у режиї Звонимира Павловича, а у продукциї новосадского Руского културного центру.
И того року на „Коцурскей чутки” буду наградзени найлєпши роботи з конкурсу КПД „ДОК” на шлєбодну, и з тему „Ґенетска модификация”. Буду вибрани и найлєпши роботи на руским язику у конкуренциї за Соцкийову награду, найлєпша карикатура, та найдлугша чутка, а на соботу у Огньогасним доме буду поставени етно столи.