БЕОҐРАД – Пред нєшкайшу схадзки Совиту за национални меншини Влади Републики Сербиї, стреду, 14. децембра, у Беоґрадзе отримана схадзка Координациї националних совитох националних меншинох у Сербиї, з хтору тераз предшедує предсидатель Националного совиту (НС) Бошнякох др Сулейман Уґлянин. Спред НС Руснацох на схадзки Координациї присуствовал предсидатель Вивершного одбору НС Желько Ковач.
Як сообщене после схадзки, по длугшей розправи Координация завжала єдинствени становиска о шицких точкох дньового шору на нєшкайшим Совиту за национални меншини, а будзе ше закладац и за одкладанє розправи о запровадзованю Акцийного плану за витворйованє правох националних меншинох и предлогу за финансованє у 2017. року з Буджетного фонду за национални меншини.
Координация думаня же ище нє здобути шицки потребни условия за прилапйованє горе спомнутих актох, та предложи же би ше их розпатрало на шлїдуюцей схадзки републичного Совиту за национални меншини.
Як догварене, шицки становиска Координациї нєшка винєше єй предшедуюци, а виражи и нєзадовольство же праве и Координациї НС-ох, як колективному орґану шицких меншинох хтори маю национални совити, нє доручена окремна поволанка за нєшкайшу схадзку.
Совит за национални меншини Влади Републики Сербиї нєшка будзе на 11 годзин у Беоґрадзе, а на Совиту, хторому предсидателька министерка державней управи и локалней самоуправи Ана Брнабич, маю присуствовац и ресорни министри – за вонкашнї дїла, просвиту, културу и информованє и правду, як члени Совиту.
Спред НС Руснацох на нєшкайшей схадзки будзе присуствовац його предсидатель Славко Рац.
