БЕОҐРАД – Координация националних совитох (НС) националних меншинох у Сербиї зоз своєй вчерайшей схадзки, отриманей у Беоґрадзе, вимага застановйованє поступку приватизованя меншинских медойох – сообщене з Националного совиту Бошнякох.
Застановйованє приватизованя ше вимага прето же би ше, у сотруднїцтве националних совитох з держвнима орґанами, до конца рока винашло цо адекватнєйши ришеня за добре информованє на язикох меншинох, окреме Албанцох, Бошнякох и Болгарох – гварене у сообщеню.
Координация заключела же меншини доруча свойо предкладаня за заєднїцких представительох до Националного просвитного совиту, Реґулаторней аґенциї за електронски медиї и до Националного совиту за културу.
Схадзка Координациї националних совитох отримана и пре зашеданє Роботней ґрупи за виробок Акцийного плану за национални меншини и у вязи з тим заключене же, пре одредзени формални и материялни елементи Акцийного плану, як и динамику будуцей роботи на тим значним документу, Координация до конца тижня предложи вименки и дополнєня предлогу спомнутого плану.
Тиж так, прилапене и предкладанє же би ше Роботну ґрупу за виробок Акцийного плану подзелєло на три ґрупи – по обласцох.
Члени Координациї ше заложели за єй институционалне змоцнованє, же би Координация НС-ох була цо кредибилнєйши партнер и держави и медзинародней заєднїци – поведзене у сообщеню НС Бошнякох.