КОЦУР – У рамикох Двацец другей Културней манифестациї „Костельникова єшень”, нєшка, 12. новембра, у ОШ „Братство-єдинство” у Коцуре на 12 годзин будзе стретнуце школярох з нашима писателями – Ирину Гарди Ковачевич, Меланию Римар и Миколом Шантом.
На вечар, на 18 годзин у Читальнї, на литературно-музичним вечаре наступя академик Юлиян Тамаш, а будзе представена и нова збирка поезиї Миколи Шанту „Вселенска черкотка”, у виданю НВУ „Руске слово”. О кнїжки будзе бешедовац критичарка Олена Планчак Сакач, стихи буду читац ґлумица Александра Лендєр и автор, а на обидвох спомнутих програмох у Коцуре у музичней часци участвує шпивачка Танита Ходак.
На ютре, 13. новембра, програма „Костельниковей єшенї” будзе у Руским Керестуре, дзе у Велькей сали Дому култури на 19 г. наступи познати Суботицки тамбурови оркестер, а публики першираз буду презентовани виривки з есейох Гавриїла Костельника „Квеце на пристолу”.