КОЦУР – Културно-просвитне дружтво „ДОК” внєдзелю отримао преширену схадзку Управного одбору (УО), вєдно з округлим столом о информованю и „ярнїм коктелом” з хторим привитана яр, а на сходзе наявени и вецей наступни активносци Дружтва.
После анализи дотерашнїх активносцох, наявене же Дружтво у другим кварталє того року планує означиц дзень планети Жеми, видац дзецински роман „Кеша” Владимира Сабо-Дайка, финализовац започату акцию „Зоз затичку по ошмих”, та орґанизовац програму з нагоди Велькей ноци, дзе планована и вистава подобових роботох Силвестера Макая.
На сходзе поведзене же на тогорочним Драмским мемориялє Петро Ризнич Дядя у Руским Керестуре ДОК будзе участвовац з представу „На терапиї у Милеви”, авторки Катарини Фейди, а у пририхтованю фотомоноґрафия коцурскей Основней школи, авторки Леони Ґаєр, та двоязични зборнїк афоризмох Милана Добровольского.
На округлим столє о информованю предсидатель ДОК проф. др Михайло Фейса з членами УО анализовал руски медиї – РТВ и „Руске слово”, та локални друковани медиї „Ґлас” и „Бачка Прес”. Винєшени позитивни и неґативни критики на рахунок истих и заключене же у векшини з нїх подїї КПД „ДОК” нєдостаточно заступени.