РУСКИ КЕРЕСТУР – Вирни рускокерестурскей парохиї св. оца Миколая вчера шветочно преславели Перши дзень Рождества Христового, а дзень пред тим, зоз шпивачами и Всеночним – Вилїю.
Крачунску Архиєрейску Службу Божу у катедралним храме вчера предводзел преосвящени владика Георгий Джуджар, з домашнїма священїками – парохом о. Михайлом Малацком и капеланами о. Владимиром Медєшом и о. Михайлом Шантом.
Владика у казанї шицким домашнїм и госцом повинчовал же би Крачун преславели у правдивей християнскей радосци, мире и любови, а на Служби були и представителє Националного совиту Руснацох.
На Служби Божей шпивал и домашнї Мишани хор Дому култури и Катедралней церкви св. оца Миколая, под руководительством Лидиї Пашо.
Крачунске всеночне у Вилїйовей ноци всоботу, 24. децембра було на 23 годзин, тиж го предводзел владика Георгий, а попри домашнїх, сослужели и сященїки з наших парохийох – о. Владислав Рац з Коцура, о. Алексий Гудак з Вербасу и о. Дарко Рац з Бачинцох.
И того року вирни на Вилїю у своїх домох дочековали малих и вельких шпивачох и винчовачох, котрих було и з велїх сушедних и дальших местох.
Нєшка, на Други дзень Крачуна на богослуженьох ше преславює и Собор Богородици и Осифа Обручнїка, а Служби Божо на 8, 10 и 17 годзин.
На ютре, на Треци дзень Крачуна Церква ше здогадує на першого мученїка Штефана, а по шицких службох Божих будзе и мированє. Попри службох на 8, 10 и 17 г. будзе и Дзецинска на 11,30 г., а у Малих шестрох на Циґлашоре на 15 годзин.