ДЮРДЬОВ – Вчера у Дюрдьове отримана рочна, источашнє и виберанкова Скупштини КУД „Тарас Шевченко”, на хторей предсидатель Скупштини Мирослав Чакан у Звиту о роботи за 2014. рок начишлєл шицки активносци секцийох, роботу аматерох и фаховцох, госцованя и орґанизованє рижних концертох, фестивалох и манифестацийох.
Медзи нїма визначени Музични вечар „Тал”, пошвецени роботи музичного дїяча Михала Лїкара, побиду Тамбурового оркестру на Републичней смотри и доставанє Златней плакети, госцованє у Словацкей, премиєру дзецинскей представи и госцованя на шицких наших манифестацийох и фестивалох. Скупштина єдногласно прилапела Звит о роботи и финансийни звит, дзе цалосни розходи у прешлим року були понад милион 360 000 динари, а прилапени и План роботи за 2015. рок, у хторим приходи предвидзени на прейґ милион 370000 динари.
Вибрани нови состав Надпатруюцого одбору, чий предсидатель и надалєй будзе Яким Чапко, а за предсидателя Дисциплинскей комисиї вибрани Яким Барна. Место Мирослава Ґубаша, Маринка Дудаша и Якима Барну, до Управного одбору, хтори ма 19 членох, вибрани млади Борис Цап, Мирослав Киш и Борис Балїнт.
Попри велїх наступох и орґанизованя програмох, того року будзе означени и ювилей – 70-рочнїца снованя КУД „Тарас Шевченко”, а програма означованя будзе у децембру.
На схадзки Скупштини визначене добре сотруднїцтво з Националним совитом Руснацох, Заводом за културу войводянских Руснацох, секретариятами АП Войводини, Општину Жабель и спознорами. Одлучене же рочна чланарина за тот рок була 800 динари, а Дружтво ше и у тим року будзе намагац шицким членом подаровац пригодни дарунки.