КУЛА – Як и шицки други активносци и манифестациї Руснацох, кулска општина потрима и Централну преславу означованя Националного швета Руснацох, у януаре 2016. року – гварене вчера на розгварки представительох наших институцийох з чолнїками Општини Кула, отриманей у Кабинету предсидательки Скупштини општини (СО) Кула Снежани Мркаич.
Понеже по розпорядку отримованя централних програмох з нагоди 17. януара шветочносц нарок плановане отримац у Кули, вчерайше стретнуце було инициялне за снованє Орґанизацийного одбору преслави, як и за доставанє технїчно-лоґистичней и другей потримовки за єй орґанизованє од Општини Кула.
О тим з предсидательку Скупштини Општини Кула Снежану Мркаич, заменїком предсидателя Општини Кула Велибором Милоїчичом, началнїком Општинскей управи Велибором Савковичом и шефом Одборнїцкей ґрупи Сербскей напредней странки у кулскей СО Перицом Видеканїчом бешедовали предсидатель Вивершного одбору Националного совиту Руснацох Желько Ковач, директор Заводу за културу войводянских Руснацох (ВР) Серґей Тамаш и предсидатель Руского КУД „Др Гавриїл Костельник” у Кули Владимир Бучко.
Директор Заводу за културу ВР Серґей Тамаш домашнїх поблїжей упознал з дотерашнїма програмами централного означованя нашого швета и сотруднїцтвом з локалнима самоуправами у їх орґанизованю, наглашене же и у Кули то будзе афимация Руснацох, як у городзе так и у општини, а догварене же з предсидательом Општини Кула Драґаном Трифуновичом директор Заводу подпише и окремни меморандум о техничним сотруднїцтве и потримовки. З тим, як поведзене, у буджету Општини годно плановац и одредзени потребни средства за тоту намену.
У будуцим Орґанизацийним одборе за Централну преславу Националного швета Руснацох у Кули буду и представителє локалней самоуправи, вчера такой догварене же єден з нїх будзе директор Културного центру Кула Каменко Бертич, дзе шветочносц будзе и отримана, так же после розгварки у Општини, Ковач, Тамаш и Бучко нащивели и Културни центер.
Як вчера порадзене, початком мая будзе конституованє Орґанизацийного одбору за преславу у Кули, а начално порадзене же Централна преслава нарок будзе 16. януара.