КУЛА – Дом здравя Кула стреду, 10. фебруара, достал нову превозку за Наглу помоц, вредну 3 милиони 750 000 динари, а пенєж за купованє обезпечени з општинского буджету. Ключи новей превозки за Службу наглей помоци директорови Дому здравя др Жаркови Шевинови придал заменїк предсидателя Општини Кула Велибор Милоїчич.
Милоїчич з тей нагоди гварел же Општина Кула за Дом здравя пошвидко планує набавиц и ултразвучни апарат, вредни коло 3 милиони динари, а видвої и 3,6 милиони динари рочно за анґажованє лїкарох-специялистох котри хибя у Доме здравя – за ґинеколоґа, офтамолоґа (очного лїкара) и лїкара спортскей медицини.
– Опредзелєли зме и 5 милиони динари за технїчне отримованє и оправянє обєктох Дому здравя, як и 2 милиони за одплацованє камати на длуство за лїки. Пошвидко будзе розписана и явна набавка за пораєнє простору на месце дзе була Народна библиотека, дзе би мала почац вибудов нового обєкту за специялистични служби, у чим обчекуєме потримовку и од ресорного министерства – гварел Велибор Милоїчич.
Як гварел др Шевин, остатня превозка за Наглу помоц до кулского Дому здравя обезпечена ище 2007. року, так же то будзе велька помоц у роботи, бо лєм прешлого року превежени коло 2 000 пациєнти, без тих котри иду на диялизу.