Кулянци Други дзень Пасхи преславели з кир Георгийом

автор маф; фото:шсл
1.3k Опатрене

КУЛА – Вирни грекокатолїцкей парохиї у Кули тродньове швето Пасхи преславели шветочно у церкви и у своїх домох, почитуюци традицию и обичаї, а на Други дзень их нащивел и наш владика Георгий Джуджар.

На Перши дзень Воскресна утриня и перша Служба Божа з пошвецаньом кошаркох з вельконоцним єдзеньом була на 5, друга на 10 годзин, а у Крущичу Служба и пошвецанє паскох на 9 годзин.

На Други дзень швета Архиєрейску Службу предводзел преосвящени владика Георгий, а сослужели домашнї священїки – парох о. Виталий Лотоцки, ЧСВВ, капелан о. Платон Салак, ЧСВВ, керестурски капелан о. Михайло Шанта, а на Служби присуствовал и римокатолїцки парох у Кули о. Дюра Кишюгас. Шпиванє предводзел дзияк з Руского Керестура Янко Виславски, а помагал му домашнї дзияк у мире Яким Рамач.

Владика у казанї здогаднул же Христово воскреснуце основа нашей вири и вири до нашого воскресеня, а до нєба мож войсц лєм з чистим шерцом, хторе ше здобува з покаяньом.

По Служби традицийни Вельконоцни концерт у церкви отримали дзецинска и хорска секция старших домашнього КУД „Иван Сенюк”, хторих пририхтала диригентка Надїя Воротняк. Дзеци коло церкви виведли и традицийни українски вельконоцни звичай – танєц гаївки, а на концу ше числени присутни и фотоґрафовали з владиком опрез церкви.

Служби Божо у кулскей церкви були и вчера, а у тей нашей парохиї мированє ше отримує на шлїцуюцу – Томову нєдзелю.

ПОВЯЗАНИ ТЕКСТИ