БЕОҐРАД – Школярка ОШ „Петро Кузмяк” з Руского Керестура Леонела Цифрич завжала друге место у своєй катеґориї на Републичним змаганю „Цо знаш о транспорту” и пласовала ше на Европске змаганє, цо историйни успих. Попри Леонели, Заходнобачки округ на Републичним змаганю представяли ище двойо школяре з Керестура – Иван Рац и Даяна Рац, та Милутин Дїканович з Кляїчева, и тиж посцигли добри резултати.
Змаганє школярох основних школох „Цо знаш о транспорту” отримане 20. и 21. мая у Гали „Пионир” у Беоґрадзе”.
Змаганє ше состої з ришованя тесту (максимално мож освиїц 100 боди) и задаткох на двох полиґонох – транспортного и полиґону схопносци – (по 100 боди). На Републичним змаганю ше змагали школяре з 26 округох у двох возросних катеґорийох – у Б катеґориї од 10-12 роки и у Ц катеґориї од 13-15 роки (окреме дзивчата и хлапци).
Цифричова спомедзи 26 змагателькох була друга з 283-ома бодами, цо перша републична диплома з транспорту у историї Школи „Петро Кузмяк”
Иван Рац посцигнул 275 боди та у Б катеґориї за хлапцох бул седми, док Даяна Рац з 280 бодами у Ц катеґориї завжала дзевяте место, цо тиж найвекши успихи у тих катеґорийох за керестурску Школу.
Штварти член екипи Заходнобачкого округу Милутин Дїканович назберал 263 боди, та спомедзи 26 екипох, екипа того округу завжала барз добре пияте место.
Школярох з керестурскей Школи за дотерашнї и Републичне змаганє пририхтовал наставнїк Зденко Шомодї, котрому то було уж шесте участвованє з керестурскима школярами на змаганю на державним уровню.
Репрезентацию Сербиї на Европским змаганю, у хторей и Леонела Цифрич, творя два дзивчата и двоме хлапци з Б катеґориї. Попри пририхтованьох у своїх школох, початком септембра буду мац и специялни заєднїцки на Авали у Беоґрадзе, а Евопске змаганє будзе у септембру у Праги, у Ческей.