БЕОҐРАД – Главни одбор Лиґи социялдемократох Войводини (ЛСВ) прилапел предлог референдумского питаня, хторе глаши „Чи Република Сербия треба же би зоз законами защицела наших польопривреднїкох од нєлоялней конкуренциї з иножемства и тайкунох по питаню длугорочного закупу польопривредней жеми?”. З нїм и 100 000 подписами гражданох будзе вимагац од Скупштини Сербиї же би розписала гласанки о Предлогу вименкох Закона о польопривредней жеми.
– Кед би странци од 2017. року без огранїченя куповали жем, лєбо кед по прилапйованю вименкох Закона годно закупиц жем у Войводини на 30 роки, то длугорочно загрожи польопривреднїкох и їх дзеци – сообщела ЛСВ.
Покраїнски одбор Демократскей странки (ДС) сообщел же тиж повола своїх членох и симпатизерох же би ше приключели до акциї збераня подписох за розписованє референдуму з хторим ше будзе вимагац забрана предаваня, лєбо видаваня польопривредней жеми на 30 роки странцом, лєбо домашнїм бизнисменом.