БЕОҐРАД – Вчера у Беоґрадзе отримане протестни шпацир з хторим члени Лиґи социялдемократох Войводини (ЛСВ) и гражданє сцели указац нєзадовольство зоз Законом о буджетскей системи и Законом о буджету. З тей нагоди придали и вимогу Уставному суду за оцену уставносци тих законох.
– Пред дзешец роками, кед прилапени Устав Сербиї, зишли зме ше опрез Скупштини и були зме процив нього. Теди шицки твердзели же вон барз значни, а тераз го ше шицки одрекаю. Нє знаме чи ше вообще будзе применьовац, та прецо ше нє применює лєм часц хтора ше одноши на Войводину – гварел предсидатель ЛСВ Ненад Чанак опрез Уставного суду.
Вон наглашел ше нєт правней держави покля ше Войводини нє враци два милиярди еври, за кельо є очкодована за остатнї дзешец роки. Чанак гварел же Уставни суд „будзе реаґовац так швидко як и кед утарговал компетенциї Войводини”.
Протестне шейтанє прешло без инцидентох, а колона ишла од Площи Николи Пашича по будинок Уставного суду з транспарентами „Правда за Войводину”, „Чийо нашо пенєжи”, „Войводина наша пиха” и „Дзе сце тераз уставобранителє?”.