НОВИ САД – З нагоди Медзинародного дня мацеринского язика, у шедзиску Лиґи социялдемократох Войводини (ЛСВ), уж по традициї, отримана конференция за новинарох.
З начишльованьом позитивних прикладох рижних формох пестованя мацеринского язика у Войводини, окреме седемдзешатих и осемдзешатих рокох, алє и неґативней пракси хтора ушлїдзела дзеведзешатих рокох прешлого вику, чийо пошлїдки видно и нєшка, представителє ЛСВ двоязично – по сербски и кажде на своїм мацеринским язику – бешедовали о значносци мултиязичносци, насампредз у Войводини.
Окремну увагу прицагла инициятива за врацан виучованя язика дружтвеного штредку до порядней настави, хтору порушали Олена Папуґа и Александар Мартон.
Олена Папуґа визначела же людзе вецей нє знаю цо то язик дружтвеного штредку, анї ше нє жиє так же Руснак, жиюци з Мадаром, Словаком, лєбо Нємцом, такой бешедує и його язик. То нєшка нє присутне. Присутне лєм знац анґлийски язик, а нє и язик свойого сушеда. Папуґова думаня же з єдну добру дискусию о тим цо значи толеранция и мултиязичносц, ЛСВ дойдзе до того же ше уведзе язик дружтвеного штредку до войводянских школох.
Спомнута инициятива вчера писмено доручена Министерству просвити Сербиї и Покраїнскому секретарияту за образованє.