БЕОҐРАД – Же би посланїки зоз шицких обласцох Сербиї були єднак заступени у Скупштини Сербиї, Лиґа социялдемократох Войводини (ЛСВ) шицким посланїцким ґрупом у Народней скупштини дала Предлог закона о вибераню народних посланїкох, хтори предвидзує вименки у виберанковей системи по хторих би Сербия мала пейц виберанково єдинки, преноши Бета.
Предсидатель ЛСВ Ненад Чанак гварел же би з таку систему Скупштина була репрезентативнєйша, понеже би у нєй були посланїки зоз шицких крайох Сербиї.
ЛСВ предлада же би єдна виберанкова єдинка була у Беоґрадзе, одкадз би ше виберало 58 посланїкох. Друга би мала буц у Новим Садзе, облапяла би посланїкох з цалей Войводини и отамаль би ше до Скупштини Сербиї виберало 63-оїх посланїкох.
Мачвански, Колубарски, Златиборски, Моравски, Рашски, Шумадийски, Подунайски и Расински управни округ би мал 68 посланїкох, а з Браничевского, Поморавского, Борского, Заєчарского, Топлїцкого, Нишавского, Пиротского, Ябланицкого и Пчиньского округу би ше виберало 57 посланїкох, предклада ЛСВ.
По тим предкладаню ЛСВ, у Скупштини Сербиї би мали буц и штверо посланїки зоз шедзиска у Беоґрадзе, а то би були державянє Сербиї котри нє маю пребуванє у других виберанкових єдинкох и гражданє котри пребуваю у иножемстве.