Уж коло штири роки каждого штвартку вирни у парохиї у Шидзе у Лєтнєй владическей резиденциї од 10 по 12 годзин ше збераю на друженє вєдно зоз парохом о. Михайлом Режаком, хтори и порушал таки сходи. Вон гвари же вирни, окрем же су на богослуженьох, маю потреби стретнуц ше през тидзень у опущеней атмосфери, побешедовац о каждодньових темох и проблемох, попиц кафу…
– Кед сом порушал инициятиву за штвартково друженя, вирни то добре прилапели и одволали ше – виприповедал о. Режак. – Там ше помодлїме, зашпиваме, а на друженя приходзи и наш парохиян и композитор Славко Загорянски, хтори грає гармонику.
Дакеди приду вецей вирни, дакеди менєй, алє тоти сходи зачувани по нєшка. Вше их здогадуєм же би голєм на два годзини зохабели свойо роботи и каждодньово обовязки и пришли ту.
Кед зажимєнє, после швета св. Миколая, през крачунски швета, та по конєц пошвецаня обисцох до конца януара, теди звичайно павза у друженю, а потим ше вирни ознова сходза.
Як наглашує о. Режак, вирни хтори приходза на сходи ту означую и свойо родзени днї, а пред павзу у тих стретнуцох, св. Миколай пред тим як у церкви нащиви наймладших, перше нащиви старших и обрадує их зоз пакециками, а вони му шпиваю. Тиж, на вецей заводи ше нащивйовало и парохиянох у доме за старих „Луана” у Шидзе.
– На тот способ сцеме указац же тоти нашо парохиянє нє забути, же дахто дума на нїх, гоч су можебуц нє зоз свою фамелию и блїзкима особами и нє годни вецей анї присц до церкви на Службу Божу. З нїма побешедуєме, ошвижиме памятки и час хтори препровадзиме швидко прейдзе – гвари о. Режак.
Уж треци рок з єшенї єдно друженє нєзвичайнє, бо место же би були у будинку Резиденциї, парохиянє на тракторским прикочу одходза на єдодньови вилєт на Бановину до винїци доо „Руски двор”, хтора подзвигнута на парохийей жеми.
На швижим воздуху, у природи з попатрунком на Шид, час швидко прейдзе по шлїдуюце штвартково друженє.
Медзи поряднима вирнїками на друженю и Ганча Миклош зоз Беркасова, хторей нє чежко присц на тоти сходи.
– Вше мам тельо шлєбодного часу же бим пришла на друженє, чи то през жиму, лєбо кед красна хвиля. Попиєме кафу, бешедуєме, чуєме цо нове, дакеди зашпиваме и крашнє нам – задовольно виприповедала Ганча Миклош.
И Славко Загорянски поряднє приходзи на друженя, а кед нє час посту, звичайно приноши и гармонику.
– Любим грац и шпивац и нє чежко ми ношиц гармонику, бо зоз музику красше. А кед пост, вец нєт такого вешеля, и час препровадзуєме у розгваркох – гвари Загорянски хтори и познати композитор рускей шпиванки.