Лєтнї фестивали на Прешовщини

автор лем.фм/зам; фото lem.fm
1.4k Опатрене

ПОЛЬСКА/СЛОВАЦКА – У велїх местох у Польскей и Словацкей дзе жию Лемки-Русини през лєто орґанизовани рижни фестивали, пише портал lem.fm, а своїм читачом препоручел три як найинтересантнєйши нащивительом.

Так лем.фм препоручел Швето култури Лемкох-Русинох з Польскей и Словацкей (лєбо з двох бокох Дунайцу), хторе уж отримане 9. юлия у купелї Смерджонка у Червеним Клашторе, а на хторим, попри танєчней програми, була понукнута и русинска кухня. На тим фестивалє участвовали и професийни Танєчни ансамбл ПУЛС з Прешова, камйонски „Барвинок”, лемковска „Терочка” и други, а наступели и познати шпиваче – Ана Порачова, Мария Желєзна и дует Карашово.

У рамикох фестивалу Шветочносци под твердиню у Старей Любовнї, хтори орґанизує Русинска оброда Словацкей, на соботу, 16. юлия перше будзе отримани фестивал „Русинска ватра у Малим Липнику”, чий орґанизатор орґанизация Млади Русини. Ватра у Малим Липнику будзе мац вецей тематски цалосци – концерт фолклорних ансамблох, „Вечар русинских гласох” як и танєчну забаву до рана, а у програми участвую и госци з Ческей и України.

На нєдзелю, 17. юлия, на спомнутих Шветочносцох под твердиню у Старей Любовнї, односно у тамтейшим сканзену, попри музично-фолклорней програми будзе и вистава фотоґрафийох, як и Служба Божа по русински у древеней церкви у сканзену.

О тидзень, 24. юлия, Русинска оброда у сканзену у Бардейовских купельох орґанизує Смотру русинского и шаришского фолклору. Наступаю „Шаришанци” з Прешова, ансамбл з Биловежи, як и вецей познати шпиваче.

11-Festivali-02

ПОВЯЗАНИ ТЕКСТИ