КУЛА – На вчерайшей схадзки Скупштини општини (СО) Кула з функциї окончователя длужносци (о.д.) директора Дому култури Руски Керестур розришени Владимир Малацко, на особну вимогу, односно пре задзекованє, а за о.д. директора, на час до шейсц мешаци, меновани Йоаким Рац Мими, котри у предходним мандату окончовал длужносц директора.
З места предсидателя Управного одбору (УО) Дому култури скорей виходзеня мандату СО Кула вчера розришела Елемира Раца, а на його место меновала Биляну Ковачевич. Место члена УО Владимира Олеяра, на особну вимогу (задзекованє), до УО Дому култури меновани Сашо Палєнкаш. Шицки спомнути з Руского Керестура.
Задзекованє/розришенє Владимира Малацка будзе важаце 31. януара, а Йоаким Рац Мими на длужносц о.д. директора ступи 1. фебруара.
У складзе зоз законскима предписанями, о менованю о.д. директора Дому култури и двох нових членох Управного одбору, СО Кула глєдала думанє од Националного совиту Руснацох, хтори на електронскей схадзки отриманей од 21. януара по 22. януар до 8 годзин, з 13 гласами „за” дал позитивне думанє о спомнутих предложених кандидатох.
Розришеня и менованя на схадзки СО Кула ушлїдзели на предкладаня єй Комисиї за кадрово и административни питаня и роботни одношеня СО Кула.
Малацко за о.д. директора на СО Кула бул меновани 29. децембра прешлого року, кеди и Елемир Рац бул меновани за предсидателя УО.
СО Кула вчера дала и согласносц на Програму роботи з финансийним планом керестурского Дому култури за 2016. рок.