СРИМСКА МИТРОВИЦА – Як и уж велї роки, так и того року 30. януара нашо вирни у Митровици означели свой перши мали кирбай Антония Велького, котрому пошвецени лїви олтар у церкви.
Як гвари найстарша парохиянка Рускиня Єлка Ванчик, дакеди нашо Руснаци того дня наполнєли цали парк зоз санками зоз наших салашох и модлєли ше свойому заступнїкови Антонийови за свой статок, свойо поля и за шицко з чим ше занїмали. Йому нашо предки пошвецели тот олтар, бо як и вон, так и вони блукали по пустинї док ше нє змогли, направели свойо хижи, а вец после скоро 60 роки и свою церкву. Того дня вирни приношели до церкви пошвециц свойо польодїлски продукти, а єдну часц охабяли и церкви.
Як знаме, святи Антоний жил у трецим вику и после шмерци своїх богатих родичох роздал шицко худобним, свою шестру охабел церковней заєднїци на старанє, а сам пошол до пустинї и постал вельки учитель монашеского живота у перших викох християнства.