Мартина Афич найлєпша у Округу зоз сербского язика

РУСКИ КЕРЕСТУР – Школярка осмей класи ОШ „Петро Кузмяк” Мартина Афич у своєй катеґориї завжала перше место на Окружним змаганю зоз сербского язика як нємацеринского, хторе вчера отримане у рускокерестурскей Школи.

Афичова була найлєпша спомедзи 7 школярох осмей класи, а посцигла и найвецей – 19 боди, з можлївих 20 и пласовала ше на Републичне змаганє.

У катеґориї осмей класи по числу бодох друге место нє додзелєне, а треце подзелєли Катарина Бенка з Лалитю, та Тереза Будински и Мария-Славка Мудри з керестурскей Школи. По числу бодох, на Републичне змаганє ше пласовали и Бенкова и Будинскова.

У катеґориї седмей класи змагали ше 11 школяре и освоєни лєм три треци места, а подзелєли их Теодора Новакович и Соня Балїцки з ОШ „Петро Кузмяк”, та Петра Грисбахер з кулскей ОШ „Петефи бриґада”. На Републичне змаганє ше пласовали Новаковичова и Балїцкова.

Найлєпши школярки наградзени з дипломами, а їх наставнїци Мария Балїнт, Еуфемия Чапко з керестурскей, Соня Дюрко Надь з лалицкей и Траянка Янчевски з кулскей Школи, достали похвалнїци.

З домашнєй Школи змагали ше ище и Инес Санкович з осмей, та Ивана Планчак, Марина Надь и Анамария Няради зоз седмей класи, а змагательох було и зоз школох у Зомборе, Бездану и Купусини з мадярским наставним язиком.