КУЛА – У рамикох предвиберанковей кампанї, ношителька лїстини Сербскей напредней странки (СНС) за посланїкох у Скупштини АП Войводини Мая Ґойкович вчера, 6. априла, нащивела Кулу.
Предсидатель Општини Кула Драґан Трифунович и домашнї з локалней самоуправи и Општинского одбору (ОО) СНС госцинску упознали з намаганями же би обезпечели шицки условия за нормални живот гражданох и за привредни розвой того штредку, як и з почежкосцами у дотерашнїм комуникованю з покраїнскима орґанами, хторого, як гварели, у остатнїм чаше скоро же анї нє було.
Мая Ґойкович и домашнї з руководительства ОО СНС Кула – спомнути Трифунович, та предсидатель ОО Перица Видеканїч, його заменїк Марко Пешич, кандидати СНС з кулскей општини за народних и покраїнских посланїкох др Лїляна Бероня, Драґана Потпара и Петар Тоакрек, як и заменїк предсидателя Општини Кула Велибор Милоїчич, нащивели штанд СНС у Центре Кули, як и роботи на вибудови канализацийней мрежи у Кули.
Тиж так, Мая Ґойкович и домашнї вчера нащивели и фарму швиньох медзи Кулу и Руским Керестуром „Нуклеус аґрар Ф1”, специялизовану за продукцию приплодного материялу за швинярство.