НОВИ САД – Медзи добитнїками Видовданскей награди Городу Нови Сад за школярох з новосадских основних и штреднїх школох котри посцигли успихи на даєдним медзиокружним, републичним, лєбо медзинародним змаганю и пецеро школяре котри у Новим Садзе ходза на пестованє руского язика з елементами националней култури.
Видовданску награду достали Мирко и Мария Венчельовсково з Ветернику, Дина Мудрох зоз Сримскей Каменїци и Лара и Ана Петковичово з Нового Саду, котри ше того року окреме визначели з одличнима успихами на змаганю з руского язика и язичней култури на Медзиокружним и на Републичним змаганю.
Награди найлєпшим и найуспишнєйшим школяром уручени вчера у Городскей хижи на окремним приєму, хтори за школярох и їх наставнїкох орґанизовал городоначалнїк Нового Саду Милош Вучевич, котри з тей нагоди визначел же школяре на найлєпши способ представели себе, свойо фамелиї, школи и свой город.
Видовданска награда и подзекованя ше состоя з пенєжней награди, а з буджету Городу Нови Сад того року за тоту намену видвоєни 8 милиони динари, так же школяре достали од 10 000 до 14 000 динари, у зависносци од освоєного места.
